تجربة السنة الثانية في كلية علوم الحاسب و تقنية المعلومات في جامعة الإمام عبدالرحمن بن فيصل

بسم الله الرحمن الرحيم

سأتطرق إلى مقررات المستوى الخامس والسادس و تجربتي مع كل مقرر، هل احتجت ارجع للكتاب او اكتفيت بالسلايدات، أفضل طريقة لمذاكرة كل مقرر من وجهة نظري، مواقع ساعدتني اتمرن على المسائل او الفهم، و ملاحظات بسيطة.

مقررات المستوى الخامس:

Object oriented programming 1

Technical Reports

Digital Hardware

Communication and networks fundamental

Discrete math

Economic system in Islam

مقررات المستوى السادس:

Business  (1)

Data Structure

Database Concepts and Design

Object Oriented Programming 2

Network Protocols & E-Commerce

Professional Responsibility

 البرمجة كائنة التوجه 1 | Object oriented programming 1 :

هذا المقرر من المقررات الممتعة جدَا بالنسبة لي بالذات انه يعتمد على الفهم.

أولًا البرمجة كائنة التوجه أو البرمجة الشيئية باختصار هو مفهوم يسهل عملية البرمجة عن طريق استخدام الكائنات وربطها ببعض، يتم تطبيق المفهوم في هذا المقرر باستخدام لغة الـ Java ، طبعا يمكن تطبيق هذا المفهوم بأي لغة برمجة مثل الـC++   و الـPython  إلخ.

الكتاب كان جدَا مفيد بالنسبة لي كنت اقرأ الشابتر قراءة سريعة قبل المحاضرة و بعد المحاضرة و اذا ما عندي وقت على الأقل أمر على السلايدات على السريع قبل المحاضرة لأن جدا مهم يكون عندك فكرة عن المحتوى قبل المحاضرة.

كتابة النوت والتلخيص أول بأول ساعدني جدا من ناحية الوقت في الميد والفاينل.

المقرر يتضمن مشروع عبارة عن تطبيق او برنامج على شاشة الرن صحيح شكله مبتدئ ولكن الفكرة طريقة ربطك للكلاسات و تطبيق اللي تعلمتوه.

لكم حرية اختيار الفكرة و لكن لابد تحققوا البنود المطلوبة منكم ، من المهم بالمشروع هذا تكوني مع زميلات متفاهمين من ناحية الوقت المحدد لأنهاء كل تسليم في الوقت المناسب و كل ما بدأ الشغل أبكر كل ما كان أحسن. كذلك يفضل تختبروا أكوادكم بالكامل قبل التسليم و تتأكدوا انه يشتغل بالكامل بالطريقة اللي المفروض يشتغل فيها بدون أن يتوقف البرنامج بأي لحظة.

البرنامج المستخدم NetBeans و لتصميم الـ  UML Diagramاستخدمت موقع Draw.io أو Visual Paradigm 14.2.

بالنسبة للجزء العملي الممارسة، الممارسة، الممارسة كل ما حليتِ تمارين كل ما سهل عليك و اخذتِ وقت اقل في الحل مع الوقت.

دائما قبل لا تبدأ تكتبي أي كود في البرنامج ، اكتبي خطوات حل المشكلة على جنب فكري في كل خطوة أيش بتسوي إلى ان توصلي لحل المشكلة ثم ابدأي حولي الخطوات الى كود.

مهم كذلك تتدربي على قراءة الاكواد و توقع المخرجات من هالكود و كان ما يخلى اختبار من هالنوع من الأسئلة.

اذا طلع لك خطأ -وهذا اكيد بيصير- و ما عرفتي تحليه سواء لما تحلي التمارين او اثناء شغلكم على المشروع ابحثي عنه في جوجل و بتلاقي الحل او شيء يوصلك للحل.

كتابة التقارير التقنية | Technical Reports :

المقرر خفيف و سهل من ناحية المحاضرات و الاختبارات.

كنا نعطى تمارين بسيطة للكتابة، نكتبها و نسلمها في نفس المحاضرة.

 مطلوب مشروع كتابة تقرير احترافي ، الشروط و طريقة الكتابة كل شيء بتتعلموه في المحاضرة و بتطبقونه في تقريركم من ناحية طريقة الكتابة و صياغة المراجع ، الخط و حجمه إلخ. التقرير يتم عرضه في نهاية السمستر.

اللي تعلمتوه في هالمقرر بيمشي معاك للمستقبل في كتابة أي تقرير ينطلب منك مستقبلًا.

الكتاب مش مهم مرة، السلايدات تكفي.

الأجهزة الرقمية | Digital Hardware :

المقرر دسم و يحتاج إلى فهم عميق و لكنه ممتع جدًا.

بالبداية بيكون المحتوى مكرر شوي اللي هو التحويل بين الأنظمة الباينري و الهكسا و العمليات عليهم و بعدها بتنتقلوا للقيتز AND , OR , XOR  إلخ..

و كيفية تصميم لوجيك قيت بأقل تكلفة و أعلى انتاجية. المقرر ممتع جدا بس لا تراكمي عليك المحتوى و حاولي تفهمي كل شيء أول بأول لأن حرفيا محتوى كل محاضرة يعتمد على قبلها و ما بتمشي بدون لا تفهمي اللي قبل. 

المقرر فيه جزء عملي ممتع جدا و يعتمد انك تكوني فاهمة المحاضرة عشان تطبقي و ممتع اكثر من عملي مقرر الالكترونيات. أسبوع تاخذون لاب و الأسبوع اللي بعده يكون عندكم تقييم فيه. الكتاب مهم بس ثمنه غالي، يفضل تستعيرينه من احد.

أساسيات الأتصالات و الشبكات | Communication and networks fundamental :

هالمقرر جميل جدا ، يعلمك كيف تنتقل البيانات -ايًا كانت من المستخدم للسرفر أو حتى بين مستخدمين- بين طبقات الشبكة بتدرسوهم بالتفصيل من ناحية الوظيفة و الخصائص و ما إلى ذلك. محتوى اللاب خفيف و جميل حاولوا تدربوا على الأشياء اللي بتاخذوها باللاب لأنه سهل و حرام تضيع منك درجات بالذات ان التقييم كان open book.

 فهم المقرر يحتاج إلى وقت ولابد من مذاكرتها أول بأول عشان ما يتراكم عليك.

خاصة أن الأختبارات كانت تعتمد على الفهم أكثر من الحفظ و لو أن في جزئيات كانت تجي حفظ بس إذا فهمتي ما بتحتاجي تحفظي.

أفضل طريقة بالنسبة لي لمذاكرة هالمقرر من النوت اللي اكتبه بالمحاضرة و لاحقا لما اقرأ الكتاب ألخص كل شيء في ورق يحتوي ملخص الكتاب + النوت. السلايدات كانت حرفيًا عبارة عن صور و رؤوس أقلام إذا الأستاذة اللي تدرسك تشرح الصور بالتفصيل و فهمتي معها على الأغلب ما بتحتاجي ترجعي للكتاب.

كان فيه 2 هوموورك صحيح حله يأخذ من وقتك ولكن بتفهمي الجزئية كويس لما تحليهم 

في اللاب أستخدمنا برنامج packet tracer و wire shark .

الرياضيات المتقطعة | Discrete math :

ما اقدر أقول المقرر صعب أو سهل بس يبغى له فهم و تدريب على أفكار متنوعة. ليش؟ لأن بالمحاضرة الشرح و التمارين اللي نحلها في المحاضرة شيء و اللي يجي في الأختبار فيه أفكار إضافية نوعا ما كفيلة تخلي الدرجات تطير...

المقرر محتواه مواضيع ممتعة و بسيطة تعتمد على المنطق بس مثل ما قلت لازم تتمرنوا و تشوفوا أفكار ثانية عشان تقدري تحلي أي سؤال يواجهك.

النظام الاقتصادي في الإسلام | Economic system in Islam :

اعتبر هالمقرر من أكثر مقررات الإسلام اللي تحتاج تركيز أكثر من العقيدة و الإجتماعي كونها تتكلم عن مواضيع تفصيلية مثل المعاملات و الزكاة و مقدارها و شروطها و الربا و أنواعها إلخ.

حاولي تذاكريه من بدري عشان لا يتراكم عليك أو تختلط عليك الأمور و تخسري درجات في مادة المفروض تضمني فيها الـA+ .

جزئية الحفظ من سورة الجن إلى سورة المرسلات.

( بتجاوزك لمقررات المستوى الخامس تكوني أنهيتِ 76 ساعة ) 

 إدارة أعمال (1) | Business  (1):

المقرر دسم جدًا من ناحية الكمية والحفظ. المواضيع أغلبها معروفة و سهلة و لكن فيها كلمات و مصطلحات ممكن تكون جديدة عليك فتحتاج مذاكرة. لا تراكمي مذاكرة المادة حتى في الكويزات حاولي تذاكري المادة كل ما سمحت لك الفرصة سواء بالسيارة او بوقت انتظارك.

المقرر الوحيد من كثر الكلام اللي فيه ممكن لخصت بس اول كم شابتر بس لما بدأ الضغط مستحيل كنت اقدر الخصه غالبا كنت استخدم قلم تحديد و احدد ابرز النقاط مع النوت اللي هو عبارة عن شرح للفقرة.

المذاكرة بس من السلايدات ما احتجنا الكتاب ابد كمذاكرة.

الواجبات كانت سهلة نوعا ما و جماعية صحيح كل سؤال كان يشترط فيه عدد كلمات محددة و يمنع النسخ من أي مكان وإلا اعتبربت plagiarism، الإجابة لازم تكون من فهمك للسؤال ما يمنع ترجعي للكتاب أو حتى الانترنت للقراءة والفهم بس الإجابة لازم تكون بإسلوبك مش كوبي بيست. 

هيكلة البيانات | Data Structure:

هذا المقرر من أجمل المقررات في مستوى 6 ، ممتع جدًا جدًا و بسيط.

يدور حول طرق تخزين البيانات في البرمجة و استرجاعها. الجزء النظري منها بيكون كـ algorithms ، أما الجزء العملي فكيف تحولي الخوارزميات إلى كود. الجميل في المقرر أن يوجد عدة طرق للحل و الأجمل أن تقدري توصلي للمطلوب بإسلوبك. عشان تفهمي خطوات الخوارزمية إرسمي كل خطوة و حطي أسهم براحتك.

الخطأ اللي ممكن تسويه و كنت أستغرب من زميلاتي هو محاولة أنك تحفظي خطوات الخوارزمية بينما الموضوع كله منطق ولا له علاقة بالحفظ.

دائما بالكويزات العملية خاصة كانت تجي أفكار خارجية ما تطرقتوا لها بس سهلة جدًا لو فكرتي فيها بمنطقية و جربي تدربي على أفكار ما اخذتوها بالكلاس عشان يصير الموضوع عندك أسهل و أسهل!

مفاهيم و تصميم قواعد البيانات | Database Concepts and Design :

المقرر سهل و ممتع إذا تم فهمه بشكل جيد ، المقرر اللي المفروض ما تعتمد فيه على أستاذ المادة 100% و تحاول تفهمها بنفسك كونه يعتبر من المقررات المهمة لأنك ستطبق اللي تتعلمه كمشروع لهذا المقرر و في مشروع مقرر الـOOP2 كذلك. المقرر يتحدث عن تاريخ البيانات و كيف و لماذا يتم تخزينها و طريقة تخزينها في قواعد البيانات و المستفيدين منها و كيفية بناء قاعدة بيانات بشكل جيد و كذلك ستتعلم لغة الـ SQL المستخدمة في استدعاء قواعد البيانات في البرمجة.
ما احتجت ارجع للكتاب

البرمجة كائنة التوجه (2) | Object Oriented Programming (2) :

في المستوى الخامس كان الجزء الأول من المقرر ممتع أكثر بالنسبة لي من ناحية أن فيه تفكير أكثر.. هذا المقرر 75% منه عبارة عن حفظ للميثودز (الفنكشن) و كل وحدة شتسوي و كيف تستخدمينها و في الغالب هي طرق ثابته تفهميها تحفظيها و خلاص، هذه الميثودز هي اللي تساعدك في بناء واجهة التطبيق (GUI). الجميل في المقرر أن تصمموا واجهات و تقدروا تبدعوا فيه و تفاعل أكثر مع الواجهة مثل أي تطبيق مكتبي يحتوي على buttons و خانات للكتابة و كل مكون من مكونات الواجهة مبرمج بحيث يقوم بشيء ما عند الضغط عليه، جدًا ممتع، المشروع حقه مرتبط بمقرر قواعد البيانات لأنكم بتصمموا قاعدة بيانات خاصة بمشروع هالمقرر و كيف تستدعينها و تخزنين فيها عن طريق البرنامج اللي صممتوه *عشان توفروا على أنفسكم وقت التفكير لفكرتين ممكن تستخدموا نفس الفكرة للمشروعين و من ناحية أن بتتأكدوا أن قاعدة البيانات مبنية بطريقة صحيحة لما تسلموا أول جزء من مشروع قواعد البيانات*

الأختبارات كانت من سهلة إلى متوسطة، ما اذكر إني رجعت إلى الكتاب إلا نادرًا بس يبيلك تقرين المعلومات أكثر من مرة و تحاولي تربطينها ببعض عشان تفهمي.

و أأكد أن هالمقرر بالذات أيًا كانت الأستاذة اللي تدرسك فالجزء الأكبر من الفهم عليك.

بروتوكولات الشبكات و التجارة الإلكترونية | Communication and networks fundamental :

المقرر هذا تكملة لمقرر أساسيات الاتصالات والشبكات ، المقرر يتكلم عن طريقة عمل البروتوكولات في كل طبقة من طبقات الشبكة، المقرر ممتع بس يحتاج تركيز، المذاكرة تكفي من السلايدات في حالة أنك تكتبي شرح الصور على السلايدات لأن السلايدات من كثر الصور اللي فيها كأنها مجلة. بالنسبة للاب محتواه جميل و ممتع و أوضح و التقييم  Open book بس مع ذلك ضروري تذاكري لأن ممكن أستاذة المادة تجيب سؤال فهم بحت و كنت تقريبا اذاكر محتوى المحاضرة على السريع قبل التقييم للإحتياط، جزئية التجارة الألكترونية مهمة لأن الأختبار النهائي كان واجد أسئلة على هالجزئية بس سهلة و يكفي الفهم فيها حتى تعرفي تجاوبي.

كان فيه 2 هوموورك صحيح حله يأخذ من وقتك ولكن بتفهمي الجزئية كويس لما تحليهم.

استخدمنا برنامج wireshark فقط في اللاب.

المسؤولية المهنية | Professional Responsibly :

مقرر ممل جدًا بس المواضيع بسيطة لو فهمتيها، كله عبارة عن كلام و الكتاب جدًا مهم لأن السلايدات عبارة عن رؤوس أقلام و غير واضحة. أهم شيء لا تراكموا المحاضرات وحاولوا تذاكروها أول بأول حتى لو قراءة قبل المحاضرة عشان يكون عندك فكرة على الأقل قبل المذاكرة.

الأختبارات كانت متوسطة الصعوبة و غالبًا صيغة السؤال تكون غير واضحة، الأسئلة على هيئة مواقف و تختاري الأجابة الصحيحة أو تعداد أو تطبيق لقانون أخذتوه.

مطلوب بحث + عرض كمشروع للمقرر و المواضيع محددة تختارون منها ، بس ما يخالف لو جبتوا موضوع له علاقة بالمقرر إذا وافقت الأستاذة.

(بتجاوزك لمقررات المستوى السادس تكوني أنهيتِ 92 ساعة) 

-لازم تتجاوزي 86 ساعة على الأقل عشان تقدري تتخصصي-

***

مواقع مفيدة

* لمقرر الـOOP1 خاصة و مقرر الـOOP2 بشكل عام:

موقع هرماش ساعدني في الفهم و كذلك يحتوي على خطوات تنصيب برنامج الـNetBeans بالتفصيل. نصيحتي تبدأي في تنزيل البرنامج و تعلم المقرر ذاتيًا قبل بداية الدوام، أقلها تكوني متعودة على طريقة الكتابة في لغة الجافا.
هذا الرابط مفيد إذا حابة تختبري معلوماتك بعد المذاكرة، أستفدت منه في OOP1.

* لمقرر الـCommunication and networks fundamental خاصة و مقرر الـNetwork Protocols & E-Commerce بشكل عام:

هذا الموقع تابع للكتاب، الأسئلة مفيدة جدًا و كان غالبا يجي على نسقها في الكويزات و إن ما جات فهو مفيد جدًا عشان تختبري فهمك بعد المذاكرة.

* لمقرر الـDigital Hardware:

قناة نيسو أكاديمي في اليوتيوب مفيدة جدًا و ساعدتني جدًا، أسلوبه في الشرح و توصيل المعلومة رائع جدًا و الجميل انه بدأ من الأساسيات. 

* لمقرر الـDatabase Concepts and Design:

قناة الأستاذ محمد الدسوقي شارح المقرر بشكل واضح، صحيح مقاطع الفيديو طويلة جدًا لذلك أنصحك تسرعي الفيديو x1.5 على الأقل عشان تستغلي الوقت.

هذا الموقع ساعدنا في تطبيق المشروع عن طريق تعليمنا كيف تستخدم لغة الـSQL مع أمثلة.

طريقة تنزيل البرنامج المستخدم في هذا المقرر لم تكن واضحة -لمستخدمين الويندوز- و بعد إضاعة عدة ساعات في محاولة تنزيل البرنامج، هذا الفيديو يوضح الخطوات بالتفصيل.

* إضافة Grammarly على ميكروسوفت وورد ممكن تساعدك في الواجبات الكتابية إذا كانت لغتك مو ذاك الزود.

***

مدونة غادة

يوجد أشياء لم أذكرها لأنها مذكورة بشكل أفضل في مدونة غادة
 حاطة روابط بعض الكتب و روابط تنزيل البرامج اللي بتستخدمونها خلال هالسنة فشيكوا عليها 

***

دائما أقرأ أسئلة في ASK.fm إذا احضار الجهاز الشخصي مهم وإذا نحتاجه كثير خلال هالسنة؟

رأيي من عدة نواحي:

أولًا، (المشاريع) من ناحية إذا كنتوا كقروب تحبوا تشتغلوا مع بعض في الكلية فأكيد بتحتاجي اللابتوب بشكل يومي على افتراض اتفقتوا تقعدوا ساعتين أو ثلاث تنجزوا و هذا يختلف على حسب طبيعة المشروع مثلا مشروع قواعد البيانات كنا نجتمع مرة بالأسبوع أو مرتين و يكفي الشغل بلاب واحد أو لابين على حسب مين اللي تجمع الشغل. أما مشروع OOP2 و كونه أطول و يحتاج عدة اشخاص يشتغلوا بنفس الوقت كنا كلنا نجيب لاباتنا و نشتغل بنفس الوقت و كل يوم كل ما سمحت لنا الفرصة.

ثانيًا، (تمارين المعامل) صحيح المعامل كلها فيها أجهزة بس من ناحية مثلا لو اشتغلتي في جهاز المعمل و بعدين تطري توقفي حلك و ترسليه لنفسك بالأيميل و تردين تفتحينه أحس سالفة و مضيعة للوقت!

اللي كنت أسويه غالبا الاستاذات ينزلوا التمارين اللي بنسويها في المعمل بعد المحاضرة و اذا كان بينهم عدة أيام كنت ابدأ اشتغل عليه و خاصة في طريقي من و إلى الكلية أستغل الوقت الضائع و ابدأ احل و احلى شيء كان نظام اغلب الاستاذات إذا خلصت كل التمارين اللي المفروض نسويها في المعمل تخلينا نطلع بعد ما تشوف ان فعلا طبقناهم!

و نفس الشيء إذا كان التمرين طويل و ما بديت فيه قبل وقت المعمل و ما كفاني الوقت اخلصه في وقت المعمل كنت اكمل عليه في الطريق للبيت أو في البريكات و بكذا اتأكد أن ما يخلص الأسبوع الا انا ومخلصة تمارين المعمل.

ثالثًا، (الكويزات العملية) اذا متأكدة من جهازك ما يعلق و كويس فأنصحك تختبري فيه (و إن كان على مسؤوليتك لو طفى أو علق وقت الأختبار) ، ليش؟

لأن ببساطة لوعلق عليك أو أي شيء فهذا جهازك و متعودة عليه و بتعرفي تتعاملي معاه لو صار شيء عكس أجهزة المعمل من التوتر يمكن لو الشيء تافه ما بتعرفي تصلحيه و تكملي حل.

والسبب الأهم تضمني حقك!

حصل أكثر من مرة لزميلاتي أن بعد ما يخلص الأختبار و ترفع الملف اللي فيه الحل للأستاذة أن الملف ما يفتح عند الأستاذة لسبب ما أو يطلع لك ولها انه انرفع بس بالحقيقة ما يكون انرفع الحل على البلاكبورد! و اذا كنتي مختبرة بجهاز المعمل فهذا يعني ان كل شيء انحذف بمجرد انك طفيتي الجهاز فكيف بتاخذي حقك؟ لو صلحت و لقت حلك مو مرفوع!

إذا اختبرتي بجهازك بعد ما تختبري و ترفعي الحل على البلاكبورد سكري الحل ولا تفتحينه ابدًا الا لما تنزل لك الدرجة على البلاكبورد عشان لو ما فتح الملف اللي فيه الحل عند الأستاذة تقدر تشوف الحل من جهازك و طبعًا لازم بتتأكد أن الملف اللي فيه الحل ما انفتح ولا تعدل من تاريخ و وقت الأختبار ، وكذا تكوني ضمنتي حقك.

***

بالنسبة لي هالسنة الدراسية كانت ممتعة و متعبة بنفس الوقت ، كل موقف مر كنت أتعلم منه و التعامل مع الزميلات بمختلف الشخصيات. خلال هالسنة الدراسية أقدر أقول سويت كل الأشياء اللي قلت ما رح أسويها في حياتي الجامعية منها: رحت أختبار مو مذاكرة كويس بسبب الضغط ، أروح الجامعة مواصلة تماما بدون نوم ولا ساعة لأن ما عندي وقت أنام، و أحيانا من الضغط توصل لدرجة أشوف الشيء اللي عليه درجات أكثر و أشتغل عليه، و أشتغل مع زميلات ما أتفق معهم. المستوى الخامس كان كارثي لأن على الرغم أني سمعت هالكلام من زميلات أكبر مني إلا أني ما توقعت بيكون حقيقي لهدرجة بس الحمدلله على كل حال. المستوى السادس حاولت أصلح الأخطاء مثل: حتى لو كنت مضغوطة و أدري ما بيكفي الوقت أذاكر لازم أنام لو على الأقل ساعتين ثلاث لأن لو رحت أختبار بدون نوم مستحيل بيكون تركيزي عالي و بغلط في الأختبار و لو أني عارفة الإجابة، بطلت أخير نفسي بين شغلتين و صرت أقسم وقتي بين هذا و ذاك على الأقل أنقص شوي من هذا و شوي من هذا أحسن ما انقص واجد في جهة وحدة. بعد سنة كدفعة صرتوا عارفين بعض نوعا ما بتقدري تختاري قروبك و تكوني مع زميلات متفاهمة معهم و إن ما حصل على الأقل حاولي تكوني مع زميلات عارفة شخصياتهم و بتعرفي تتعاملي معهم لأن تفاهم القروب نص الشغل.

كنت في المستوى الخامس دائمًا أتحلطم على الأشياء اللي ما تعجبني و الحلطمة تستهلك من الشخص و هذا خطأ وقعت فيه، في المستوى السادس تفاديت هالخطأ و قررت أتوقف عن الحلطمة و كنت نادرًا ما اتحلطم و هالشيء أنعكس علي بشكل إيجابي جدًا، أي موقف أي شيء ما يعجبني كنت أردد لعل الله يحدث بعد ذلك أمرًا و ما افكر فيه الا ثواني و اركز على المهم متوقعة الخير بالشيء اللي مزعجني ولاحظت اثر هالشيء علي.

***

"ومنْ لم يذق مرَّ التعلمِ ساعة ً, تجرَّعَ ذلَّ الجهل طولَ حياته."

ختاما احب أقول لا تنسوا ان كل لحظة صعبة بتعدي و أن اذا وقعتي بخطأ بدل لا تلومي نفسك و تحمليها اكثر من طاقتها وفري طاقتك في تعديل هذا الخطأ.

كل الضغوط بمختلف أنواعها اللي بتمروا فيها هي ضرورة بتساعدكم في المستقبل فكونوا شاكرين لها.

موفقين جميعًا :)

هذه اخر تدوينه عامة لأني تخصصت في (علوم الحاسب) و الحمدلله.

تمَت